辣辣社会浪做人，总归要有根底线。进进出出要有个腔调，一个最基本个腔调。勿一定穿得西装笔挺、浓妆艳抹，啥个场合啥个穿法；红白喜事勿可能穿汗衫短裤、三点式，进游泳池也勿好穿风大衣、礼服；最近天气热到38度，登辣屋里向可以马虎，也勿至于赤膊赤屁股，男男女女侪会把握分寸；搿枪网浪因热而热个热议之一，就是公共场所，特别是公交车、地铁浪个“咸猪手”、“性骚扰”，搿种情况过去一直发生，不过名称勿同，老早子叫“耍流氓”。
阿拉年纪轻个辰光，乘公交车是有规定个，好像主要是针对男人：穿呒没袖子管个衣裳，比方讲背心；下身穿内裤，勿是西装短裤；脚浪穿拖鞋者，是勿好乘公共汽车、电车个。伊歇辰光女同胞穿得保守，就呒没必要去规定了。现在勿对了，男人还是穿得中规中矩，女小囡、女人个裙子呢，越穿越短；女孩喜欢热天，原因就在于可以尽情凉快：裙摆搭膝盖个距离远远超过廿公分，恨勿得搭三角裤并驾齐驱。袒胸露背勿稀奇，上身裸露辣光天化日下头个皮肤面积，甚至超过90%……
搿搭有一点要提请注意，假使讲辣辣“夜店”里，假使讲辣辣沙滩浪，下头穿得再短，上头穿得再少、再薄，勿会有人讲侬“异样刮搭”；“妖女”、“辣妹”出入其间，不足为怪。辣辣公交车、地铁浪，特别是乘客拥挤个高峰时段，轧得来前胸碰着后背，乃末弄勿清爽唻：“勿入调”个男人趁机会“揩油”、“吃豆腐”、“出外快”，穿得“勿像腔”个“美女”，原本只想吸引眼球个，“惹火”仔缺乏定力个“骚”男人，一个是哇啦哇啦叫“色狼”，一个是声辩“勿是故意个”，一时间青红皂白难分。
搿种情况还辣辣继续，一个是“勿像腔”，一个是“勿入调”，南腔北调呒没腔调。倘使是“资深美女”，出得门来长裙及踝，该裸露处且裸露，婉约大方个打扮，大约不至于到“惹火”个程度；“爱美之心，人皆有之”，足以让男人们充分发挥想象力，迭个就是女人个腔调。而穿得搿能介“凉快”，还要轧公交车、地铁，男性乘客唯恐躲之而不及，乘客拥挤个辰光哪能办？以“美女”为圆心，划一圈一米线？
讨厌就讨厌辣啥地方呢，“勿入调”个男人死勿光。看见仔“美女”熬勿牢，“骨头轻”，人家是有生命个高级动物，勿是新世界蜡像馆里个蜡像。只好隔开空间远远欣赏，绝对勿作兴动手动脚，拖侬到派出所里去，搿辰光就晓得成本忒高，侬乃人家当侬女朋友啊！尽管人家穿得“勿像腔”，侬绝对勿可以“勿入调”，搿就叫社会准则，搿就是做男人个底线，勿相信侬试试看。稍微提升一点讲，最近上海男人“被”评为“怕老婆”全国第一，其实是尊重女同胞做得最好。男人应该有眼绅士风度，退一万步来讲，即便是人家“鲜格格”，男人家也勿要“骨头轻”。
行文至此，拨公交车、地铁一个建议：针对目前搿种情况，是勿是需要乃老早子个“规定”重新翻出来，搭乘公交车、地铁个乘客，对男人搭女人个衣着，作出一个切实可行个新规定，穿拖鞋、高跟鞋就勿要管伊了。公共交通勿是T台，勿是作秀个舞台，勿管男人女人，让穿得忒凉快个朋友去走路，或者是乘出租车，勿要影响大多数中规中矩个乘客。与其花勿少精力处理“性骚扰”事件，还勿如广泛吸收群众意见，制订一套保障社会文明个规矩出来，现有个地铁安检搭仔公交车驾驶员，有权拦阻衣着不符规定个乘客进站、上车。
