|
眼睛一霎，跟小胡子（现在人人都叫线粉小胡子了呶）仨四个月没碰头了。格天我回家，刚吃好夜饭，谈起小胡子最近哪能，迪只喜活驹就冲进来了。咦，今朝夜里空档啊？我半真半假的问了一句。老南瓜啊，侬勿要老眼光看新人好乏。不是我口气大，手头五六个是常备的，想约啥人就是啥人。哦靿，看勿出，只有几个号头辰光，现在花头嘎浓啦？我想顺便调戏一句。老南瓜啊，看来老阿哥要帮侬上上课了。
小胡子拖了把椅子就坐在我旁边，讲穿了，才是简单来西的。迪埃小姑娘，才是仙咯咯。讲句不好听的，就得贱骨头一模一样，不抽不稳滴。侬待伊客气，伊当福气。侬拿伊笃笃掼掼，伊反而莴上来。不瞒侬讲，我可以约张三到外滩兜一圈，拿李四拎回来。我用手摸了一记小胡子的额阁头，寒热有乏。关键是看啥人吃啥人。没想到小胡子一鸣惊人。我现在就抱定白相相的主意，侬想谈，我奉陪。侬摆膘劲，阿拉再会。假使侬晓得了格套游戏规则，白相起来蛮扎劲。看到小胡子格付自信的腔调，我脑子里浮现出小胡子在外滩如鱼得水的形态。
我现在到外滩就像看戏一样，有辰光比戏还好看。舞台上才是一副做作相，外滩看到的全部是真人真事。我越是东张西望，心不在焉，女朋友越是吃我。我自家心里煞清，要是伊想掼特我，就算我距下来都没用。老法里哪能讲，女追男，隔层纱，男追女，要隔重山啦。真看不出，小胡子的道理现在是一套一套的。
小胡子，喝杯茶。阿拉姆妈泡了一杯茶给小胡子。谢谢阿姆，小胡子起身双手接过茶杯，坐下接着说，我现在发觉，夫妻相可以从谈朋友辰光就看得出来。譬如讲，了外滩看到迎面走来一对，步调不紧不慢，两人不啰嗦，互相之间还有两只拳头的空档，明年春节照排头办喜事。要是看到两嘎头弄得来像胶水得油漆一样，多数是勿出两个礼拜就蹦特勒。道理蛮简单，两个人都有自己的目的。小胡子咪了一口茶，又讲，碰到格种情况，只要我了旁边，一定拿伊拉撬特，省得让我痛苦。呵呵，我笑道，要侬管啥闲事？当然要管，小胡子理直气壮地说，伊已经惹到我头郎厢来了。我是越听越糊涂了。
侬晓得，靠了外滩的一对一对，才是女男，男女，女男，男女，女男，，，要是一个冤家就立了侬旁边三个钟头，侬吃得消乏？小胡子到底是过来人，我根本想不到靠了外滩还有嘎深奥的学问。侬阿是想问我为啥要格能排是乏，小胡子已猜到了我的疑问。出过事体的呀，一位老兄左右开弓，拿别人女朋友的钮子解开来了。奥，我恍然大悟，看来潜规则也并不新鲜，三十年前的外滩就有了。不论男女，一侧是对象，另一侧一定是同性，经典。
我碰到的最猴急的男的，多数是复员军人。一看到旁边立了嗨脚上穿的解放跑鞋，背的军用书包，我马上含一粒润喉糖，否则三个钟头下来一定喉咙痛。每三分钟要清一清嗓子，侬吃得消乏。我叫伊拉是三句半。伊三句闲话没讲完，迪只面孔就侯上去了。 我就“嗯哼”一记。有一趟碰到一只鳖三自以为磨子大，一角尺开上来，我料到伊格记生活。我就势一蹲，伊用力过猛从我身上翻出去一只狗吃屎。我马上叫起来，复员军人动手打人喽。
了外滩格块地方，侬晓得啥人嘴巴会得翻就是占便宜。格复员军人肯定不经我嫖的呀，侬复员军人就好欺负老百姓啦？大庭广众就对女同志动手动脚，还想动手打人，叫做格的人多，我放侬一马，要是一对一开，，看闹猛的是里三层外三层，伊的女朋友怕难为情，老早溜了。我的女朋友了旁边是台型扎足。一面还指手画脚，迪只垃圾，还要到外滩来混，勿拆泡丝照照镜子，只面孔像乏，，只鳖三只好闷进，头一低，灰溜溜走了。
闲话讲转来，垫刀头最多的，也是复员军人。小胡子立起来用热水瓶往茶杯里加点水，接着讲，碍想想三年当兵摸过几趟枪，扳扳手指头也算得清爽。不是炊事班就是养猪罗，三年下来就是聪明人也会得变成戆徒。格么侬自家也要掂掂分量，烂扫帚只好配破簸箕，明摆煞的事体嘛，一定要寻漂亮的妹妹。不过我有辰光自家想想也会笑出声来，全世界的男人哪能才是一只模子里刻出来的，一根筋才别牢了，一定要寻漂亮的妹妹。
上趟碰到一个背军用书包的，立了我旁边我都感到伊脚骨了发抖，我蛮同情伊，老实朋友。格女朋友一看就是不怕天火烧 （只怕跌一交，一家一档才了身郎厢，屋里空荡荡），想动复员费的脑筋。我一看，迪格再不撬特，姆没人好撬来。我跟女朋友调了一只位子，看起来我是对女朋友讲，实际上是唱给复员军人听。上个礼拜日我订了一套家生，八百块，外转内销的，我女朋友眼睛睁了滴沥滚圆，从来没听我讲起过嘛，马上贴上来了。我就是用五百块复员费，加上平常省下来的零用钿买的呀，我顺势在女朋友耳朵旁甩一句，勿要响，同时眼角朝女朋友身后一瞟。
凭良心讲，迪格女朋友反应老快，马上拎清。怪不得侬嘎吝啬，到现在小馄饨都没请我吃一碗，伊一面讲一面用手指想戳我一记鼻头。我头一仰，戳了我嘴唇上，侬晓得，我只鼻头是碰不起的。我讲，不要急，再憋一口气，等事体办好，阿拉每一个礼拜去一趟梅陇镇，对乏，我喉咙放了大一点对女朋友后面讲，要是复员费用特了，侬拍拍屁股一跑头，我吃西北风去啊。背军用书包的朋友蛮接令旨，朝我挤了一个小眼睛，头转过去对天火烧讲，阿拉朝前面再走走乏，隔壁的朋友买一套家生好像要弄的全世界才晓得一样。
小胡子看我听得蛮有味道，越讲越来劲。哪能，老阿哥的故事好听乏。其实大家肚皮里才有数。想当初线粉要是没碰到我，说不定现在还流着鼻涕在水果摊捡烂苹果吃呢。所以随便我哪能现开销，线粉总是一笑聊之，算是对我的七分服贴，三分迁就吧。小胡子一口喝了半杯茶，格趟是我帮伊加水，侬哪能还是格付败朝相，喝起茶来穷凶极恶。
小胡子朝我一笑，阿拉兄弟嘎许多年数了，还装啥客气。对乏？ 昨日夜里，还要有劲来。立了我旁边一只大块头，一身肉胳气勿算，打扮得来是大兴加恶心。白衬衫袋袋里一只卡西欧的计算器，手上拎一只三洋牌两喇叭，一付五斤吼六斤的腔调。哎，自会得有小姑娘吃伊，小姑娘长了只洋娃娃面孔，倒蛮甜。我看到大块头只手伸了小姑娘包里随手一把奶油瓜子，想不到伊还会吃烂饭。我想先侯了嗨再讲，等我捉牢伊扳头，再看伊哪能嚣张。
迪只大块头花七花八问小姑娘录音机里歌好听乏，顺手又是一把奶油瓜子。嗯，老嗲声嗲气，是啥人唱了伽好听。邓丽君侬还没听到过？人家是老上海呀，三十年代就跟赵丹伊拉一道出名，跟阿拉娘舅才是老朋友来。凭良心讲一句，要想屏牢也勿容易。我硬了头皮再听下去。昨日阿拉娘舅外汇又寄来了，我邮局的收据还了后插袋里。我一听格个无轨电车是越开越豁边了。拿外汇分明都在银行，阿拉姆妈帮了做事体的家家有外汇，迪记国际玩笑开的太大啦。还没等我上腔，只大块头接着讲，叫做侬明朝翻中班，否则阿拉明朝到红房子吃夜饭。哼，我想侬格只烂大块头也太恶劣了，钞票勿摸勿算，还要先套牢人家，再唱高调摆阔气。
嗯哼，隔壁朋友牙老大的嘛，叫得比尼梅子还响，还要装啥吃西餐，帮帮忙，红房子门面朝南朝北还没拎清了嗨。我终于屏勿牢开始上伊腔了。只看到那洋娃娃面孔两眼定洋洋地看着那大块头，像煞只要你回答出格个问题阿拉后日就去登记的腔势。阿浴位，大块头转过身来对牢我，看到人家有钞票侬眼红是乏，想考考我来，嘎小儿科的问题难得到啥人啊。迪格迪格，红房子朝南啥人勿晓得啊。
嘿嘿，侬当红房子是玉佛寺了对乏，我还没讲下去，只看到那洋娃娃面孔把背包的拉链一拉，碰到赤佬了，还好小辰光住了进贤路外婆屋里，弯到陕西路再朝左走两步就是红房子，否则真的要被伊骗进，一哎奶油瓜子就算付学费了，算我晦气，霉头触得来屋里也不认得啦，，，
（祝大家周末愉快，最近比较忙，想歇一段再接着写，先打一声招呼 8-）
| |||
|
