我的祖父祖母--老朱一世宁

老朱厄爷是上海滩上厄该铜缔宁，钞票莫牢牢。老朱出生厄辰光，伊拉爷已经四十出头了，所以宝贝得弗得了。老朱是想要啥就有啥，只要钞票买得到。


老朱小辰光住勒虹口。来勒伊自家厄记忆里，每天放学转来，一帮子犹太小宁就盯牢伊，叫伊请客买零食吃。


有一天老朱来勒放学（可能已经读中学了）路上，看到有一个外国宁踏了一部脚踏车。脚踏车龙头上不是铛铛响厄铃，而是吡吡叫厄喇叭。该个外国人喇叭一揿，旁边厄车子统统停下来，交关牛庇。老朱回到屋里要伊拉爷也帮伊去弄一部该恁介厄脚踏车白相相，伊拉爷拿勒大条子就直冲巡捕房。结果，当年上海滩上两部该恁介牛庇厄脚踏车，其中一部就是老朱厄。


接下来，日本宁来了。国民党里相一位抗日将军拔日本人追杀，老朱厄爷跟该位将军交情弗是一眼眼。风声最严厄辰光，将军就来勒老朱屋里亚了三天三夜。


虹口住弗下去了，老朱全家搬到租界。老朱厄爷邪气爱国，抗战八年，坚决弗跟日本人做生意。全家老小，带娘姨账房，统统坐吃。老朱该个辰光已经二十来岁厄样子，正好来勒租界里相上上洋学堂，跳跳“篷擦擦”，打打斯诺克。

好弗容易，抗战胜利了。老朱书也“现”好了，婚也结脱了。新娘子弗仅人长得漂亮得弗得了，陪嫁也多得弗得了。除了金银首饰外带三套红木家具以外，还有青浦良田数几十亩。老朱要寻工作了，该个容易，就勒抗日将军兄弟开厄银行任职。


糊里糊涂又是两三年，老朱尼子也养好了。听讲共产党马上要来了，老朱也有点吓丝丝。随大流逃到香港（原计划是经香港到台湾），待了半年弗到就回上海了。香港该种乡下头，象老朱该恁厄小开是登弗惯的。回到上海，丈人老头厄田已经土改改脱了，无没多少辰光，伊拉自家爷厄船物公司也公私合并脱了。全家老小，三代同堂再次坐吃。娘姨，账房老早回头脱了。


坐吃也弗是办法，老朱跟家主婆只好去失业登记站登记。共产党真是火眼金睛，一记头就发掘出伊拉厄长处。老朱分配去工人文化馆，反正白相是老朱厄强项。伊拉家主婆培训一歇，分配去小学教教画图，唱歌。有钞票人家小姐，啥人无没弹过钢琴呀。


接下来十几年，老朱就基本上无没过过好日节。抄家，批斗是肯定逃弗脱。无没送伊到提篮桥已经牢客气了。以致到老朱晚年，中国已经进入改革开放厄年代，伊还是常年穿运动衫。有句闲话说得好：过去厄就让伊过去伐。不过，老朱却弗能释怀。退休之后，每趟讲到伊厄后半生，总会伴着三水（眼泪水，鼻涕水，馋吐水）同流，长叹一声：“我现在是来勒吃官司啊。”



下集预告：许家腻小姐