（七）
几十年来，上海几家老个西餐馆，像“东海”“天鹅阁”“喜来临”“东华”咾啥，侪关个关，停个停，只剩下“红房子西餐馆”一枝独秀，居然还搬到了淮海路好地段，生意一直兴隆到今朝。 陕西南路长乐路口，“红房子”个老地址，有幢新造个红砖高楼，戳勒侬眼门前，伊面还有块新招牌：“雅克红房子MAISON POURCEL”挂勒海。
其实大家心里侪有数，迭家“红房子”并勿是从前个老店，倒是现在上海滩第一家，正宗由法国厨师直接掌勺个法式西餐馆。不过，正宗个法国菜价格勿菲，人均消费至少要八百块以上，所以大部分上海人只好是望而却步——朝伊看看。
从1935年由意大利人路易·路迈经营，勒勒霞飞路开张以来，“红房子”已经拨上海人津津乐道了七十多年。伊开头创业辰光，名字叫“罗威饭店”，号称是上海第一家法式西餐馆。后来太平洋战争爆发，饭店就关脱了。到1945年抗战胜利，路易·路迈又到亚尔培路37号买了只汽车间当门面，重新开业，店名也改成为“喜乐意饭店”。因为店个外墙漆成红颜色，老顾客叫伊“红房子”。四十年代末，外国老板拿店转拨了中国人，1956年勒重新注册登记辰光，索介就拿“红房子”定为正式店名了。
“红房子”其实蛮小个，看上去是楼上楼下，但是楼下“凹”进去半层，楼浪向“矮”了半层，所以一进门就有得两格朝下走个台阶，勿是熟客个闲话、常庄要跌跌冲冲个。我小辰光住勒“明德里”，老爹欢喜带我到锦江饭店“十三层楼”前头个街头花园拍照，伊面转只身就到“红房子”了。一进门，跑堂就迎上来：“哦吆，今朝带孙子来啦！”嘿嘿，老爹得意个笑了：“生意好勿啦？”“唉！老顾客越来越少，生意会得好伐？”的确，平常辰光店里向空荡荡个。一歇歇功夫，焗蛤蜊、乡下浓汤、葡国鸡搭仔白脱面包侪上来了。每趟吃西餐，老爹总归要摸摸我个下巴，假装问一句：“早浪起来胡子刮过了伐？”然后，再关照一次：“记牢，外国人个规矩是，勿刮胡子勿好上台面个。”其实，我小辰光并勿欢喜吃西菜，只是对刀叉感兴趣。我欢喜用餐刀刮白脱朝面包片浪搨，弄得小手搭仔嘴巴侪油光光个，别样物事，顶多吃几块“葡国鸡”里个奶油洋山芋。
文革来了，“红房子”关脱了，老爹也死脱了。伊歇辰光我走过“红房子”，心里想大概再也勿可能去吃西餐了。
1975年，邓小平出来工作，上海个西餐馆一记头又“复活”了。但是，老顾客呒没了，新顾客勿敢来，所以“红房子”还是邪气冷清个。慢慢叫、慢慢叫，“红房子”西餐开始有了眼变化：伊开始向真正个法国菜靠拢，菜里向加了越来越多个起司搭仔大蒜。再后来，“出国热”行起来了，崇洋迷外个朋友也越来越多，大家侪到“红房子”请客、做生日、轧朋友，“红房子”个名气也越来越大。我比较欢喜个是伊拉个“洋葱汤”“焗蛤蜊”“清炖牛肉”。当时一顿西餐也就是几块洋钿，但是搭当时人个一般月收入相比，还是相当奢侈个。
改革开放以后，我常庄有机会出国工作，乃末再晓得“红房子”勿算“正宗”西餐。不过正宗西餐搭中国人个传统饮食习惯一比较，简直就是“茹毛饮血”：伊拉侪蛮“生”个，甚至还要带眼血水。再讲，所谓“烹调”，外国人只欢喜“调”，就是加啥个汁来拌来吃，勿讲究“烹”，就是要烧得入味。所以，真正个西菜，中国人、上海人肯定是吃勿惯个。搿能看来，“红房子”根据西方个一眼方法，更加多采用个其实是中国菜个烧法，创造出“海派西菜”，来适合上海人个口味，又带了西菜风味，所以受大家欢迎。另外一个就是，勒当时个条件下头，大师傅弄勿到有眼西菜个原材料，只好用别样代替，以致于出现了“焗蛤蜊”替代“焗蜗牛”搿能个特殊西菜。
“红房子”现在搬到淮海中路茂名路口了，搿搭原来是“上海西餐馆”个店址。“上海西餐馆”原来叫“复兴西餐社”，是家英式餐馆。勿晓得为啥领导要让伊关门，偏生又拿地方转拨了“红房子”，看来“红房子”实在是忒红了。现在“红房子”仍旧邪气红，每日天高朋满座，远近各方，包括外国人侪慕名而来。
“红房子”为啥一直介“红”？我猜大概有搿几个原因：首先，伊个西菜别具一格，外国呒没，上海特有；第二，消费勿高，两家头吃一顿大概是一到两百块；第三，地段好，交通便利，淮海路人气旺。最后，当然是伊名气响，牌子老。覅看陕西路“雅克红房子”现在神气十足，说勿定有一天，伊要恳请老房东“红房子”再搬转去呢！迭个是邪气有可能个哦。
朗读：潘慧芳
