我的祖父祖母--许家腻小姐

许家腻小姐是啥人？呶，老朱厄家主婆。


腻小姐厄爷是青浦大地主，不过伊拉一家们老早从青浦乡下头搬到上海租界里相住了。反正乡下头厄地有人帮伊拉种，房子有人帮伊拉看。辰光一到，就有人送米送钞票来了，涅节好过得弗是一眼眼。


腻小姐厄卖相邪气好。读中学厄辰光，有一天来马路啷相踏脚踏车，被星探看中。腻小姐回到屋里相诰伊拉爷一讲，当场就被伊拉爷反锁了房间里两日两夜。第二天，星探来听回音，被门房赶脱勒。


屋里相有个嘎好看厄囡儿恩长大了，就弗太平了。上门提亲厄人踏破许家厄门槛，最最要命厄是，还有上海滩老大厄徒弟也来轧闹猛。腻小姐厄爷只好托人去摆平，托来托去，弗晓得哪能，正好托到老朱厄爷。流氓摆平了，老朱厄爷顺势帮自家尼子提提亲，直接省脱十八只蹄膀。


腻小姐风风光光出嫁了。嫁妆就弗去讲伊了，单单酒水就摆了三天流水席。嫁到老朱屋里后，前后左右隔壁邻舍就叫伊新嫂嫂。新嫂嫂叫了无没几年，就改叫许老师了。为啥道理？因为解放了，妇女翻身了，新嫂嫂经过培训到小学做老师了。


接下来十几年，许老师倒也弗是怨天怨地。比起娘家兄弟关牢监，自己男人还算无没吃大苦头。小学老师一做就做到光荣退休。退休以后，许老师吃过早饭打打太极，吃过中饭打打中觉，吃过夜饭打打麻将，交关乐惠。可惜老朱走得比伊早。


有一天，打过中觉，听到有位老先生来楼下问：许家腻小姐啊住了该沓。伊从凉台上伸出头一张，虽然过了几十年，还是认得出厄。是伊厄高中同学，记得伊吃过二小姐厄喜酒无没多少辰光就到美国去了。老先生上楼进门，朝墙壁上老朱厄遗像看了看。接下来，大家叙叙旧，老先生看看手表讲明朝再来。


第二天，老先生来厄辰光带了一束花，到底是洋派人。吃过茶，老先生开口了：“腻小姐，我今朝来是向侬求婚厄。我厄家主婆前几年也没了（看了一眼老朱厄遗像）。侬晓得伐，我读书厄辰光就老欢喜侬厄，请侬考虑考虑。”伊对老先生讲了点啥，无没人晓得。反正老先生无没几天以后就回美国了。该一年，许家腻小姐整整八十有两。



下集预告：侠气出趟