襄阳路伊瘩块

这两天天气勿错，勿热勿冷，本来正好是到地里厢做生活种菜格辰光，不巧肩胳出了点小毛病，勿好用力气， 就勒屋里孵豆芽，顺当便乱写点末事大家看看白相相。
去年秋初回上海，一家头出去瞎走走，就到了襄阳路，我是从建国路朝北走格，迭张应该是勒永嘉路复兴路当中。

永嘉路阿拍了一张，拍路名牌子是为了证明， 勿是替人家证明噢，为格是自家下趟看格辰光清爽迭瘩是啥地方。

最好证明襄阳路永嘉路口格是迭掰店，啥个末事最好吃？

乔家栅！ 馋吐水勿要流出来，哦。迭位踏脚踏车朋友，小阿弟，功架勿错。
呒勿任何事体阿呒勿任何目的，随意马路上趟趟，照片拍拍，东张西望， 回忆回忆老底子。

记得老里八早襄阳路迭一段商业勿是老发达格，现在是阿狗阿猫全部钻进钞票里去了。

走进去就是嘉善路小菜场了， 迭块地方好像是白俄比较多， 是伐？还有我老早认得一位“老流氓阿飞”（迭个是伊自家讲格）姓陈， 叫啥忘记了，就是在嘉善路小菜场卖肉个， 手艺勿错， 一刀下去讲几斤几两就是几斤几两，比我要多六七岁来， 现在卯七十岁老梆瓜了。


为至屋理住房面积少许大点， 人民群众想尽办法，上天可以入地办勿到， 格末只好立体朝上发展了。

迭个是一种真实的马路风情


好了，走到了南昌路襄阳路口了， 今朝到此结束，祝大家今朝夜道出遁好饭困只好觉，明朝起来脑子清清爽爽上班去。