與王家衛有緣千里能相會 張國榮為補水傳聞激動不已
| |||
| English summary 林： (望住走近來的張國榮，用愉快的聲音說)呢！辣士里，面口好好睇喎，近來一定精神愉快啦。 張：冰姐，你面口都好睇啫，乜股票無損手咩？ 林：蝕o左就唔諗佢囉。吃幾多著幾多，整定，以後都係唔好搞咁多野，又呢又路，到頭來，結局－樣。 張： 我都係咁話，所以，我股票都唔買，你知我點解唔買股票嘛？就係受石天影響。記得多年前有一天，股災，石天拍緊戲，打個電話問完價，呆o左成一個幾鐘頭，唔埋得位拍。見過石天果次的情形，今生都唔敢買股票。你話得啱啦，吃幾多，著幾多，整定。 | |||
 | 林：嘉雲台有層樓最近賣o左呀？香港D物業賣晒，唔睇好前景呀？ 張：嘉雲台層樓係賣o左，係唔睇好物業前景，重有物業未賣，我阿媽住緊果層都係我嘅，未賣晒。 林：聽講你最近心情好靚？ 張：係呀，o係番禺拍《九星報喜》好開心，呢個戲，會得嘅，因為拍時我有感覺，有感覺，就會收得，我唔係時時有感覺o架。 | ||
| 拍西片收到足 林：難得你肯讚，你哥哥周時唔俾面人，未拍先鬧都時常有o架啦。 張：要多謝百鳴，呢個時候開戲，為不少演員同工作人員提供就業機會。咁淡個市，好難得o架。 林：係唔係都要多謝你哥哥添呀，無你肯減價，百鳴計唔掂條數開唔成，大家都有機會就業啦。 (坐在旁邊的張國榮的親戚黃小清插嘴：冰姐講呢句最啱哥哥聽嘞。) | |||
張：(笑)冰姐呀，《九星報喜》好快就殺青，一月份，我上上海拍一部西片，今次無折頭呀，收到足，人地一毫子價都無減。噯，楊嘉珍你識佢，係佢搵我嘅，一陣佢會來。本來我要去柏林影展做評判，依加唔去啦。 林：做乜唔去喎，柏林影展評判噃，都幾抵去，可以同導演告假，佢叫乜名呀？ 張：佢叫葉纓，大陸人，佢拍的電影o係大陸好賣座，今次拍的係西片，百分之八十講英文，二十講中文，我演一個三十年代的中國共產黨員，係知識分子來o架。柏林影展要去成十三日…下次先啦。 |
|
評審普遍心理
林：下次, 你估次次都搵你來評咩？下次另一班人甄選，未必睇上你。 張：我，好多戲拍啫，明年搵我拍戲的有許鞍華、嚴浩，嘿，唔知係唔係D人知我想搵退休金，所以猛搵我呢？ 林：退休金你就唔使搵啦，我淨係想間你，你賣o左龜背灣間屋，又賣o左嘉雲台層樓，加上一百場演唱會的收入，咁多現金，如何處置？ 張：唔理呢D架啦，冰姐，咁唔得閒，邊度理得呢D現金呀？ | |||
| 林：係唔係有個『銀行家』代你處理現金咁呀？ 張：吃咩野呀，叫野吃吖。 林：我吃煙三文魚。 張：哈，你諗嘅同我一樣，我都諗住吃煙三文魚，你叫個湯吖，洋蔥湯好唔好呀？ 林：好，我想問你，台灣電影金馬獎，你估你係唔係得梗影帝呢？ 張：得梗！？梗係唔係啦。 林：係呀嗬，人人睇好梁朝偉，竟然連提名都無，可見評審團同普通觀眾始終唔係一夥，咁，你又覺得何人會係你對手呢？ 張：以我咁多年經驗，我地D熱門嘅最怕兩種人，一係老野，一係新丁。始終有D人情分嘅，老野就諗住，佢都做左幾十年，今次唔俾，無機會啦；新丁則認為佢咁新，做得咁好，不如俾佢。我好記得UFO一次，我同梁朝偉都有提名，大家都係 UFO 嘅戲，阮世生唔經意話：俾(選票)偉仔啦，辣士里唔志在嘅，話我唔志在喎，提得我名，我梗志在o架。連阮世生都咁話，可見普遍心理認為：佢攞咁多獎，佢唔志在嘅。今次金馬獎，苗天機會都幾高，苗天，係得o架。 | ||
不喜歡做棋子 林：辣士里呀，我記得《春光乍洩》公映時，你遲遲唔去睇，你好似有D怕面對呢部片。因為你同王家衛拍的時候唔開心，你擔心佢將你的戲剪到好似一個大配角，搞到自己唔開心，所以，側側膊，遲遲唔去睇片，差不多落畫，兼且聽大多人講你表現好，你至去戲院睇。 張：係呀，小清陪我去睇嘅。果日我遲到，同偉仔床上果場始終未睇過，我唔擔心佢剪我戲！我表現咁好，佢捨得剪咩。康城係我自己唔去之嘛，我同王家衛唔開心，主要係因為我唔鍾意佢的方法，演員o係佢手上始終只係棋子，你做乜，你唔知，邊場係開始，邊場係結局，你亦唔知，任佢擺佈，我喜歡有劇本，知道自己做乜。 林：但，你o係佢(王家衛)手上，最見光芒噃，你有今日，到依加仍有咁多好導演想用你，都同王家衛拍o左一連串你有份的電影有關啦。 張：咁又唔淨止一個王家衛拍得我好，陳凱歌都拍得我好。 林：要有好多好電影，才足夠證明你係一個好演員。如果淨係得一部《霸王別姬》，人地話撞彩啫。 張：咁又係。王家衛有咁多好演員… 你唔好唔記得，佢唔係一個人的功勞，但有張叔平的剪接，有杜可風的攝影。 激動倒瀉咖啡 林：咁，你都係o係王家衛手上特別有光芒啫。我最鍾意的電影叫《阿飛正傳》，你呢？你覺得自己表現最好係邊部？ 張：(諗o左成兩分鐘)我覺得我o係《胭脂扣》表現最好。 林：唔係嘛，哥哥，因為唔鍾意王家衛，唔情願讚《阿飛》呀？我問你咯，以後王家衛搵你拍戲，你會同佢合作嘛？ 張：有緣千里能相會。 林：聽講，o係阿根廷的時候，戲未拍完，你趕住返香港搞演唱會，佢地留你，你話無時間，最後，你提出補水五十萬，至俾多o左期佢地…佢地當時諗：你張國榮唔係無期吖，不過想補水?…。 張：無件咁嘅事(但面有不悅之色，咖啡竟倒在餐巾上，很有儀態的張國榮，這是罕見的。)你邊度聽來？好易啫，可以叫佢將賬目攤開來睇o架，我有攞呢筆錢，實有賬目。你信佢地唔會俾我現金的啦。(辣士里一邊抹去桌上的咖啡，一邊向我解釋。因為他的激動，令我以為佢係掩飾果五十萬的事，不過，後來查問過，張國榮並無多收王家衛五十萬補水。) 拒義子進娛圈 張：你知我當初點解肯拍《春光乍洩》嘛，你知王家衛係點同我講的嘛？佢話想拍－部同性戀的電影，太多的同性戀電影歪曲o左同性戀，佢想拍一部，用正面的角度去探討。我話你咁鍾意金城武，點解唔用金城武？佢解釋話，想拍一部香港人的同性戀電影，我至應承佢。不過，後來佢都無做到，佢用o左張震，總之，我唔理佢咁多方法拍，我係乜野講到明，佢係明明想咁，講成另一樣，等你以為係咁。 林：辣士里呀，你做乜煞有介事咁收個契仔呀？你怕百年歸老無人擔幡買水，故收個義子來供書教學呀？ 張：我細個時無嘅野，大個o左好想俾到人，就係親情。阿正呢個仔好乖，讀書又叻，佢好聽我話，我無收錯佢。我真係供書教學o架，佢一年返香港三次，幾幸福呀，我係英國讀書時，幾難得至返來一次。 林：阿正依加成六呎高，又靚仔有型，會唔會入娛樂圈呢？ 張：張國榮義子咁名義咯喎？唔俾，唔俾入娛樂圈。 林：人地親生仔，爹o地媽咪都未敢話唔俾？你不過是義父，咁霸道？ 張： 讀得書，點解唔讀書呀？讀得書，唔使入娛樂圈。 林：從而可知，縱使是天王巨星，亦有一篇娛樂圈血汗史。 往柏林做評判 (褟嘉珍到，拿來一個英文的電影劇本。本來不打算去柏林影展做評判的張國榮，不知是否是受我林某一番話影響，竟同褟嘉珍討論起檔期來。最後，期好似度掂，張決定去柏林，並對小清說會去英國探望義子，並同埋佢一齊去睇歌劇。) 張：(對禢嘉珍)你做監製指那部由葉纓執導的暫名《紅色戀人》的電影)，我至接的咋。 (禢說：吓？咁要同爾冬陞講吓啦。因為爾也在籌備開戲，亦褟嘉珍監製。) 林：爾冬陞將會拍咩野戲呀？ (褟說是關於日本幫會的，現正在做資料搜集。) 張：(很愉快同自信的掹吓手)男主角又係我添。 林：哥哥，你搬去加多利山，D傳媒又如影隨形咁追蹤你到加多利山。你的感覺係點呀？會唔會覺得好討厭呀？ 張：無所謂，如果唔係黎智英，佢地搵地產入屋影o左我屋企，我未必咁快賣o左間屋。間屋賣o左賺咁多，我都要多謝黎智英啦。 演戲無關身材 林：再問你一個問題，你成日話唔去荷李活拍片，又話佢地去到荷李活，拍親都重複舊時，應該拍D荷李活無嘅，有中國特色的，你估同你人仔細細，唔夠大件頭，拍埋去D鬼處，唔夠件頭，唔夠好睇有無關連呢？ 張：唔夠件頭？林冰，演戲喎，你估段秤呀？你知唔知湯告魯斯有幾矮呀？你知羅拔烈福拍《俏郎君》同巴巴拉史翠珊平行，要挖條坑俾巴巴拉史翠珊行嘛？德斯汀荷夫曼、阿爾柏仙奴又有幾矮嘛。林冰，演戲唔係講件頭嘅，係講呢度(用手將自己個頭，上、下、左、右圈o左一個圈來示意，帶著激動的，冰姐，霎時間也變了林冰，林冰。) 林：(我鍾意張國榮，因為佢有呢份激動，但時常口講心果句。時常暴露內心世界，都是我喜歡的。) 明報周刊 (1998)
| |||
